ကိုယ့်မှာရှိတဲ့ ပိုက်ဆံလေးတွေကုတ်ခြစ်စုပြီးဝယ်ထားတဲ့အဝတ်အစားလေးတွေမှာစွန်းထင်းသွားခဲ့ရင် ထိုင်ငိုချင်မိမှာပါပဲ။ တချို့အစွန်းအထင်းတွေကိုသာမန်အဝတ်လျှော်ဆပ်ပြာနဲ့လျှော်လို့ မပျောက်ပါဘူး။
အစွန်းချွတ် ဆေးသုံးလို့ရပေမယ့် ကိုယ့်အဝတ်အစားရဲ့အရောင်ကိုထိခိုက်စေနိုင်လို့အရောင်ပါတဲ့ အထည်တွေမှာ အစွန်းချွတ်ဆေး မသုံးသင့်ပါဘူး။ ကိုယ့်ရဲ့မှန်တင်ခုံနဲ့မီးဖိုချောင်ကပစ္စည်းလေးတွေနဲ့ ပြဿနာကိုအလွယ်တကူဖြေရှင်းလို့ရပါတယ်။ ပေသွားပြီးတာနဲ့ချက်ချင်းဖျက်ပါ။
- နှုတ်ခမ်းနီ
အင်္ကျီမှ ာနှုတ်ခမ်းနီတွေစွန်းထင်းသွားရင်ဝေးဝေးသွားစရာမလိုပါဘူး။ မှန်တင်ခုံမှာတင် ဖြေရှင်းလို့ ရပါတယ်။ ပေသွားတဲ့နေရာကို hair spray လေးဖြန်းပြီးမိနစ်အနည်းငယ်ထားပါ။ ပြီးမှလျှော်လိုက်ပါ။
- ချောကလက်
ချောကလက်စားရင်း အင်္ကျီပေါ်ကျသွားခဲ့ရင် အလျင်စလို မပွတ်ပစ်လိုက်ပါနဲ့။ ပိုဆိုးသွားပါလိမ့်မယ်၊ ခြောက်သွားအောင်ခဏစောင့်လိုက်ပါပြီးမှ အဖတ်လိုက်ခွာလိုက်ရင် အလွယ်တကူဖြေရှင်းပြီးသား ဖြစ်သွားပြီပေါ့။
- ဝိုင်နီ
ဝိုင်နီစွန်းရင် ဝိုင်ဖြူနဲ့ဖျက်ပါ။ ပျံ့သွားမှာစိုးလို့ မပွတ်ပစ်ပါနဲ့။ ဝိုင်ဖြူမရှိဘူးဆိုရင် ဆားကိုသုံးပါ။ ပေသွားတဲ့ နေရာပေါ်မှာဆားဖြူးပေးပြီး ခဏလေးထားလိုက်ပါ။ ပြီးရင်ရေနွေးစိမ်ပြီးမှလျှော်ပစ်ပါ။ ဒီနည်းသုံးမယ်ဆိုရင်ဝိုင်နီတွေစိုနေတုန်း ချက်ချင်းဖျက်ပါ။
- ဆီ
ဆီစွန်းတာက အဖြစ်အများဆုံးပါပဲ။ ကိုယ်စားတဲ့ အစားအစာတွေမှာဆီပါနေတာကိုး။ ဆီအစွန်းဖျက်တဲ့ နည်းတွေ အများကြီးရှိတဲ့အထဲက အလွယ်ဆုံးနည်းတွေဖော်ပြပေးလိုက်ပါတယ်။ ကိုကာကိုလာနဲ့ ဆီအစွန်းကို ဖျက်လို့ရပါတယ်။ ကိုကာကိုလာရဲ့အရောင်တွေ ပြန်မစွန်းနိုင်ပါဘူး။ သိပ်အကြာကြီးတော့ မစိမ်ထားနဲ့ပေါ့နော်။ ဆီစွန်းထားတဲ့နေရာအပေါ်ကို ကိုလာတွေလောင်းချပြီး ၁နာရီလောက်ထားပါ။ ပြီးမှလျှော်ပါ၊ hair spray လဲ သုံးလို့ရပါတယ်။ခေါင်းလျှော်ရည်လဲ သုံးလို့ရပါတယ်။
- ဂျိုင်းချွေး
ဂျိုင်းချွေးတွေကြောင့် အင်္ကျီအရောင်အဖျော့တွေ အဖြူတွေမှာအဝါရောင်ချွေးအစွန်းတွေစွန်းနေလို့ မဝတ်တော့ပဲချောင်ထိုးထားရတယ်ဆိုရင် သတင်းကောင်းပေးပါမယ်။ အလွယ်တကူမီးဖိုချောင်ထဲမှာပဲ ပြဿနာဖြေရှင်းလို့ ရပါတယ်။ အလွယ်ဆုံးနည်းကတော့ ဆား ၄ဇွန်းလောက်ကို အစွန်းပေါ်မှာပုံပေးပြီး ရေနွေးနဲနဲလောင်းချပါ။ ပြီးရင် ဖော့လေးနဲ့အစွန်းတွေပျောက်သွားတဲ့အထိ ပွတ်ပေးပါ။ ဂျိုင်းလေးပြန်ဖွေးသွားလို့ အင်္ကျီလေးပြန်ဝတ်လို့ရသွားပြီပေါ့နော်..။
Myanmar Textile & Garment Guide
source : jasmine
