၂၀၁၈ ခုနှစ်က အထည်ချုပ်ကဏ္ဍမှ ပို့ကုန်တန်ဖိုး ဒေါ်လာ ၄.၆ ဘီလျံနီးပါး ရရှိခဲ့ပြီး
လာမယ့် ၂၀၂၄ ခုနှစ်မှာ မြန်မာနိုင်ငံ အထည်ချုပ်ကဏ္ဍမှ ပို့ကုန်တန်ဖိုး ဒေါ်လာ ၁ဝ ဘီလျံ ရရှိရန် မျှော်မှန်းထားကြောင်း ( ၁၁ ) ရက်နေ့က ရန်ကုန်မြို့ရှိ ကုန်သည်စက်မှုအသင်းချုပ်မှာ ကျင်းပတဲ့ မြန်မာနိုင်ငံအထည်ချုပ်လုပ်ငန်းရှင်များအသင်း၏ ပဉ္စမအကြိမ်နှစ်ပတ်လည် အသင်းသားစုံညီအစည်းအဝေးမှာ အသင်းအတွင်းရေးမှူး ဒေါ်ခိုင်ခိုင်နွယ်က ပြောခဲ့တာဖြစ်ပါတယ်။
“ကျွန်မတို့ကဏ္ဍမှာ အလုပ်သမားတိုးတာက ငါးဆ၊ ဝင်ငွေတိုးတာက ၁၀ ဆပေါ့နော်။ ဒါဆိုရင် ကျွန်မတို့ အလုပ်သမားတွေရဲ့ ထုတ်လုပ်မှုကို နှစ်ဆတိုးအောင်လုပ်ရမယ်။ အဲဒီအတွက် တောက်လျှောက်ဆောင်ရွက်နေပါတယ်” လို့ ဒေါ်ခိုင်ခိုင်နွယ်က ပြောပါတယ်။ လက်ရှိအချိန်တွင် မြန်မာနိုင်ငံ အထည်ချုပ်လုပ်ငန်းရှင်များအသင်းမှာ အသင်းဝင် ( ၅၀၀ ) ကျော်ပြီး အလုပ်သမားခန့်ထားမှုမှာလည်း ငါးသိန်းကျော်ရှိကြောင်း သိရပါတယ်။
အထည်ချုပ်လုပ်ငန်းက လုပ်သားအရင်းပြု ( Labour Intensive ) စက်မှုလုပ်ငန်းဖြစ်တဲ့အပြင် စက်မှုနိုင်ငံတစ်နိုင်ငံအဖြစ်ရောက်ရှိရေးအတွက် အဓိကအခြေခံလုပ်ငန်းတစ်ခုလည်းဖြစ်ပါတယ်။ အခြေခံလူတန်းစားများကို အလုပ်အကိုင်အခွင့်အလမ်း အများဆုံးဖန်တီးပေးနိုင်တဲ့ CMP အထည်ချုပ်လုပ်ငန်းများ ဖွံ့ဖြိုးတိုးတက်ဖို့နဲ့ ကျွမ်းကျင်လုပ်သားများ မွေးထုတ်နိုင်ဖို့ သင်တန်းကျောင်းထူထောင်ပြီး အဆင့်မြင့်နည်းပညာများ ရယူကာ ပြန့်ပွားအောင် ဆောင်ရွက်နိုင်ခဲ့ပါတယ်။
Read More>> မြန်မာနိုင်ငံ အထည်ချုပ် လုပ်ငန်းရှင်များ အသင်း၏ ရည်ရွယ်ချက်များ
မြန်မာနိုင်ငံ အထည်ချုပ်လုပ်ငန်းရှင်များအသင်းအနေဖြင့် ILO နဲ့ပူးပေါင်းပြီး အလုပ်သမားရေးရာအရာရှိတစ်ဦးအား Labour Law နဲ့ပတ်သက်တဲ့ သိသင့်သိထိုက်သည်များကို သင်တန်းအပတ်စဉ်တိုင်း ဟောပြောပို့ချခြင်း၊ အသင်းဝင် အထည်ချုပ်စက်ရုံများအတွင်းတွင်လည်း အလုပ်ရှင် ၊ အလုပ်သမားအရေးကို ကူညီဖြေရှင်းပေးခြင်းများ ဆောင်ရွက်ပေးလျက်ရှိပါတယ်။
ကျွမ်းကျင်လုပ်သမားများ စဉ်ဆက်မပြတ်ရရှိရန်နဲ့ နည်းဥပဒေများ ဖြန့်ဖြူးပေးနိုင်ရန် ရှေ့လုပ်ငန်းစဉ်တစ်ရပ်အဖြစ် သတ်မှတ်ထားသည့်အတိုင်း ရှေးရှုဆောင်ရွက်ခဲ့ရာ မြန်မာနိုင်ငံ အထည်ချုပ်လုပ်ငန်း လူ့စွမ်းအားအရင်းအမြစ်ဖွံ့ဖြိုးရေးစင်တာ (MGHHRIX ) အနေဖြင့် လက်ရှိအချိန်အထိ သင်တန်းအမျိုးအစား ၁၂ မျိုးကို ဖွင့်လှစ်သင်ကြားပေးလျက်ရှိတယ်လို့ သိရပါတယ်။
ဒီ CMP လုပ်ငန်းက အမျိုးသမီးငါးသိန်းခန့်ပါဝင်တဲ့ အသက်မွေးဝမ်းကျောင်းကို ဖန်တီးပေးထားနိုင်ပြီး ဒေါ်လာလေးဘီလျံကျော်ရှိတဲ့ ထုတ်ကုန်တွေကို တင်ပို့ရောင်းချနိုင်တာမို့ ကုန်သွယ်မှုကဏ္ဍ ၊ အလုပ်အကိုင်ရရှိမှုနဲ့ မြန်မာနိုင်ငံရဲ့ GDP ကို များစွာအထောက်အကူ ပြုလျက်ရှိပါတယ်လို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ဒုတိယဝန်ကြီး ဦးအောင်ထူးက အဆိုပါအခမ်းအနားမှာ ပြောကြားခဲ့ပါတယ်။
Source: Daily Eleven
Myanmar Textile and Garment Directory
