What's new



ဝီဂါများအား ကျွန်ပြုခိုင်းစေသည့် တရုတ်အထည်လုပ်ငန်းကို အမေရိကန် ပိတ်ပင်

တရုတ်နိုင်ငံအနောက်ပိုင်းက ဝီဂါမွတ်စလင်တွေကို ခေါင်းပုံဖြတ် အမြတ်ထုတ်နေတဲ့ တရုတ်အစိုးရပိုင်အထည်လုပ်ငန်းက ပစ္စည်းတွေ တင်ပို့ခွင့်ကို အမေရိကန် အကောက်ခွန်နဲ့ နယ်စပ်ဒေသ လုံခြုံရေးဌာနက မနေ့မှာ ပိတ်ပင်လိုက်ပါတယ်။

 

Xinjiang Production and Construction Corps (XPCC) လို့ အမည်ရတဲ့ အဲဒီလုပ်ငန်းကို တရုတ်စစ်တပ်က လုပ်ကိုင်နေတာဖြစ်ပြီး၊ နိုင်ငံအတွင်း အကြီးဆုံး ကုန်ထုတ်လုပ်ငန်းတွေထဲက တစ်ခုလည်း ဖြစ်ပါတယ်။ အမေရိကန် ဘဏ္ဍာရေးဝန်ကြီးဌာနဟာ ဇူလိုင်လက XPCC ရဲ့ ဒေါ်လာပေးချေမှုအားလုံးကို ပိတ်ပင်ခဲ့ပါတယ်။

 

အမေရိကန် နယ်စပ်ကုန်သွယ်မှုကို ကိုင်တွယ်ထားတဲ့ ပြည်တွင်းလုံခြုံရေးဝန်ကြီးဌာန ဝန်ကြီး ကန်နသ် ဆူစီနီလီက ‘Made in China’ ဆိုတာဟာ ‘သတိထားရမယ့် တံဆိပ်’ ဖြစ်တယ်လို့ မနေ့က သတင်းစာရှင်းလင်းပွဲမှာ ပြောကြားခဲ့ပါတယ်။

 

“ဒီပွဲတော်ကာလမှာ မိသားစု၊ မိတ်ဆွေသူငယ်ချင်းတွေအတွက် ဈေးသက်သက်သာတဲ့ အဝတ်အထည်တွေ ဝယ်ကောင်းဝယ်ကြမှာပါ။ အဲဒါတွေ တရုတ်နိုင်ငံက လာတယ်ဆိုရင်တော့ ခေတ်သစ်ကမ္ဘာက အဆိုးရွားဆုံး လူ့အခွင့်အရေး ချိုးဖောက်မှုတွေထဲက ကျွန်ပြုမှုကနေ ထွက်လာတဲ့ ပစ္စည်းတွေလည်း ဖြစ်နိုင်ပါတယ်”

 

၂၀၁၅ ခုနှစ်က တရုတ်နိုင်ငံ အထည်ထုတ်လုပ်မှုရဲ့ ၃၀ ရာခိုင်နှုန်းအထိ ရှိခဲ့တဲ့ XPCC အပေါ် ပြုလုပ်ထားတဲ့ အမေရိကန်ရဲ့ ဘဏ္ဍာရေးဆိုင်ရာ ပိတ်ဆို့မှုဟာ ဒီလုပ်ငန်းနဲ့ ပတ်သက်နေတဲ့ ကုမ္ပဏီတွေ၊ အဝတ်အထည်လုပ်ငန်းတွေအပေါ်မှာလည်း သက်ရောက်မှာ ဖြစ်ပါတယ်။ စက်တင်ဘာလတုန်းက အမေရိကန် အကောက်ခွန်နဲ့ နယ်စပ်လုံခြုံရေးဌာနဟာ ရှင်ကျန်းဒေသက ထွက်တဲ့ အထည်အားလုံးနဲ့ ခရမ်းချဉ်သီးထွက်ကုန်အားလုံးကို ပိတ်ပင်ခဲ့ပါတယ်။ 

 

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဟွာချွမ်ယင်းက အမေရိကန်ရဲ့ ဒီပိတ်ပင်မှုဟာ သတင်းမှားတွေကို အခြေခံဆောင်ရွက်တာဖြစ်ပြီး၊ တရုတ်လုပ်ငန်းတွေနဲ့ တရုတ်နိုင်ငံကို ဖိနှိပ်လိုတဲ့ သဘောမျိုးဖြစ်တယ်လို့ တုံ့ပြန်ပြောကြားခဲ့ပါတယ်။ 

 

တရုတ်နိုင်ငံအနောက်ပိုင်း ရှင်ကျန်းဒေသမှာ ဝီဂါနဲ့ အခြားလူနည်းစု လူမျိုးတွေကို တရုတ်အစိုးရက ဘာသာရေး၊ လူမျိုးရေးအရ ဖိနှိပ်ချုပ်ချယ်မှုတွေ လုပ်ဆောင်နေပြီး အနည်းဆုံး ဝီဂါ တစ်သန်းလောက်ကို အကျဉ်းစခန်းတွေထဲ ထည့်ထားတာ၊ လုပ်အားခေါင်းပုံဖြတ်တာတွေ ရှိနေတယ်လို့ ကုလသမဂ္ဂနဲ့ ကမ္ဘာ့မီဒီယာတွေက ကျယ်ကျယ်ပြန်ပြန့် ဖော်ပြခဲ့ကြပါတယ်။တရုတ်ကတော့ ဒီသတင်းတွေကို တစ်စိုက်မတ်မတ် ငြင်းဆိုထားပါတယ်။

 

Myanmar Textile & Garment Guide

Ref: Nikkei Asia

Read 642 times
Rate this item
(0 votes)