CMP စနစ်ဖြင့်ကုန်ကြမ်းများကို ပြည်ပမှတင်သွင်း၍ ချုပ်လုပ်လျက်ရှိသည့် အထည်ချုပ်စက်ရုံများအနက် ကိုဗစ်ကာလအတွင်း အထည်ချုပ်စက်ရုံ ၄၂ ရုံအပြီးပိတ်သိမ်းခဲ့ပြီး အလုပ်သမားလေးသောင်းကျော်အလုပ်လက်မဲ့ဖြစ်ခဲ့ကြောင်း မြန်မာနိုင်ငံ အထည်ချုပ် လုပ်ငန်းရှင်များအသင်းမှ သိရပါတယ်။
"အလုပ်သမားဝန်ကြီးဌာနရဲ့နောက်ဆုံးစာရင်းအရဆို သူတို့ရဲ့စက်ရုံ၊ စက်ရုံဆိုတာမှာအထည်ချုပ်တစ်ခုထဲမဟုတ်၊ ဖိနပ်တို့ အိတ်တို့ရောပေါ့ ပိတ်သိမ်းစာရင်းက ၆၄ ရုံ၊ အလုပ်လျှော့တဲ့စာရင်းကနှစ်သောင်းခွဲဝန်းကျင်ရှိပါတယ်။ဒါပေမဲ့ အလုပ်သမားဝန်ကြီးဌာနကထုတ်ပြန်တဲ့စာရင်းကလျော်ကြေးပေးပြီး အပြီးအပိုင်ပိတ်တဲ့စာရင်းသာဖြစ်ပါတယ်။ တကယ်လို့ စက်ရုံတစ်ရုံကလျော်ကြေးပေးတဲ့လမ်းကြောင်းထဲမှာရှိနေမယ် ။ သူတို့ကိုလည်း ပိတ်ဖို့ သတင်းပေးထားတဲ့စက်ရုံတွေတောင် မပါပါဘူး။ အလုပ်သမားစာရင်းဆိုလည်း လျော်ကြေးပေးပြီးသား စာရင်းသာထုတ်ပြန်တာဖြစ်တဲ့အတွက် ပိတ်ပြီးလျော်ကြေးမရှင်းရသေးတဲ့ အလုပ်သမားစာရင်း မပါပါဘူး။ မြန်ကူက စာရင်းအရ ပထမလှိုင်းအပြီးမှာ အလုပ်ရုံ စက်ရုံ ၁၀၆ ရုံနဲ့ အလုပ်သမားလေးသောင်းခွဲလောက်ကို အထောက်အပံ့ပေးထားပါတယ်။ကျွန်မနားလည်သလောက်စက်ရုံပေါင်း ၃၀၀ ကျော် မှာအလုပ်သမား ငါးသောင်း ကျော်ကိုသူတို့ပေးပြီးပါပြီ။
စာရင်းအတိအကျကတော့ မကြာခင်သူတို့ထုတ်ပြန်မှာပါ။သူတို့ကယာယီပိတ် အပြီးပိတ်တာ ကိုယ်ဝန်ဆောင်တဲ့သူတွေလည်းပေးတာရှိတော့ အားလုံးစုစည်းပြီးပြန်ချိန်ရမှာရယ်၊ အဖွဲ့ဝင်စက်ရုံတွေဆီကကောက်ခံတဲ့စာရင်းအရတွေရယ် ကျွန်မတို့မန်ဘာ ၆၀၀ ကျော်မှာ စက်ရုံက ငါးရာ မပြည့်ပါဘူး။မန်ဘာထဲမှာကဒီဇိုင်နာတွေ၊ ပိတ်ရောင်းတဲ့ရုံတွေ၊ ပန်းထိုးရုံတွေလည်းပါတယ်။စက်ရုံ ၅၃၄ ကအိတ်စပို့ အင်ပို့ပေါ့။ပြည်တွင်စက်ရုံကတော့၄၀ရှိပါတယ်။ အဲ့ဒီမှာအကြောင်းပြန်လာတာက ၃၆၆ ရုံပြန်ကြားပါတယ်။ဒီစာရင်းအရဆို ၄၂ ရုံကလုံးဝပိတ်သိမ်းသွားပြီဖြစ်ပါတယ်။ခုနကျန်တဲ့ရုံသုံးရာလောက်မှာ ပိတ်သိမ်းစာရင်းဘယ်လောက်လဲ စုံစမ်းနေတုန်းပါ။ ပိတ်တဲ့အထဲမှာ အလုပ်သမားတစ်ရာနဲ့သုံးရာဘယ်နှစ်ရုံ သုံးရာနဲ့တစ်ထောင် ဘယ်နှစ်ရုံလဲဆိုတာမျိုးတွေမှာ သုံးရာနဲ့တစ်ထောင်ကြား များပါတယ်။ အလုပ်သမား သုံးလေးထောင်ပိတ်တဲ့ရုံတွေလည်း ရှိတဲ့အတွက် ပိတ်တဲ့ရုံ ၄၂ရုံရဲ့အလုပ်သမားက မရှိဘူးဆို လေးသောင်းအထက်မှာရှိတယ်လို့တွက်ထားပါတယ်။နောက်ဆုံးတွက်ထားတဲ့အနေအထားပါ"လို့ မြန်မာနိုင်ငံအထည်ချုပ်လုပ်ငန်းရှင်များအသင်း အတွင်းရေးမှူးဒေါ်ခိုင်ခိုင်နွယ်ကပြောပါတယ်။
CMP လုပ်ငန်းများ၏ အဓိကဈေးကွက် မှာ ဥရောပသမဂ္ဂအဖွဲ့ဝင်နိုင်ငံများဖြစ်ပြီး တစ်နိုင်ငံချင်းအနေဖြင့် ဂျပန်၊ တောင်ကိုရီးယား၊ အမေရိကန် အပါအဝင် အခြားနိုင်ငံများသို့ တင်ပို့နေခြင်းဖြစ်ပါတယ်။
"ဒီကာလမှာ ကုန်ကြမ်းပြတ်လပ်သွားတဲ့အလုပ်ရုံတွေ ကုန်ချောတင်ပို့တဲ့နိုင်ငံတွေရဲ့စီးပွားရေးအခက်အခဲကြောင့်အမှာစာရပ်သွားရတဲ့စက်ရုံတွေ အပါအဝင်အကြောင်းအမျိုးမျိုးကြောင့် ပိတ်သွားတဲ့အလုပ်ရုံစက်ရုံတွေရှိပါတယ်။ဒါပေမဲ့ကျွန်မတို့အဖွဲ့ဝင်မဟုတ်တဲ့ အလုပ်ရုံ စက်ရုံတွေရဲ့စာရင်းကိုကျွန်မတို့မရနိုင်ပါဘူး"လို့ဒေါ်ခိုင်ခိုင်နွယ်က ပြောပါတယ်။ မြန်မာအထည်ချုပ်ဈေးကွက်သည် ကုန်ကြမ်းယူ၍ ကုန်ချောပြန်ပို့သော CMP လက်ခစားဈေးကွက်သာဖြစ်ပြီး ရင်းနှီးမြှုပ်နှံငွေများသော Free on Board (FOB), Own Design Manufacturing (ODM), Own Business Manufacturing (OBM) စာချုပ် အမျိုးအစားများနှင့် လုပ်ကိုင်ရန် အခက်အခဲများရှိနေကြောင်း သိရပါတယ်။
#MyanmarLabourNews