ဘီဘီစီက ရန်ကုန်တိုင်းဝန်ကြီး ချုပ် ဦးဖြိုးမင်းသိန်း ကို သီးသန့်တွေ့ဆုံမေးမြန်းခဲ့ပါတယ်။ ဒီလို ပြည်သူတွေတွေ့ကြုံနေရတဲ့ အခက်အခဲကို သူဘယ်လို ဖြေရှင်းသွားမှာပါလဲ။
NLD အစိုးရတက်လာပြီး ၂ နှစ်တာအတွင်း ရန်ကုန်တိုင်းဒေသကြီးမှာ အဆောက်အအုံ၊ လမ်းတံတား၊ ဆောက်လုပ်ရေးလုပ်ငန်းတွေ တိုးချဲ့လာပေမယ့် ကုန်ထုတ်လုပ်မှု လုပ်ငန်းတွေ အားကောင်းဖို့ လိုအပ် နေသေးတယ်လို့ ရန်ကုန်တိုင်းဝန်ကြီးချုပ် ဦးဖြိုးမင်းသိန်းက ဘီဘီစီနဲ့ သီးသန့်တွေ့ဆုံမေးမြန်ခန်းမှာ ပြောဆိုခဲ့ပါတယ်။
ရန်ကုန်တိုင်းဝန်ကြီးချုပ် ဦးဖြိုးမင်းသိန်း နဲ့ ဘီဘီစီ အကြီးတန်းသတင်းထောက် စောရန်နိုင်ရဲ့ သီးသန့်မေးမြန်းခန်းမှ အထည်ချုပ်ကဏ္ဍ၊ အလုပ်သမားလုပ်ခတို့နဲ ပတ်သက်တဲ့ အမေးအဖြေ တချို့ကို ကောက်နုတ်တင်ပြထားပါတယ်။
မေး။ ။ ရန်ကုန်တိုင်းရဲ့ စီးပွားရေးအခြေအနေက တိုးတက်လာပြီလား။ လူထုအကျိုးပြုတဲ့စီးပွားရေးအပါအဝင် ပြည်သူတွေ တွေ့ကြုံနေရတဲ့ အခက်အခဲကို ဘယ်လိုဆောင်ရွက်သွားမှာလဲ။
ဖြေ။ ။လတ်တလောအခြေအနေမှာ ကျွန်တော်တို့က ထုတ်လုပ်မှုကဏ္ဍကို မြှင့်တင်ဆောင်ရွက်ရမယ့် အခြေအနေရှိပါတယ်။ ကျွန်တော်တို့က ပြည်ပက သွင်းကုန်များပြီးတော့ ပို့ကုန်က အားနည်းနေတဲ့ အခြေအနေ ရှိပါတယ်။ ဒါကြောင့် နိုင်ငံခြားရင်းနှီးမြှပ်နှံမှုတွေနဲ့အတူ ကျွန်တော်တို့ ထုတ်ကုန်ကို မြှင့်တင်နိုင်ဖို့ ရှိပါတယ်။ ဒါပေမယ့် ဒီအခြေအနေက ချက်ချင်း ထုတ်ကုန်မြှင့်တင်နိုင်ဖို့ ဆိုတဲ့အခြေအနေထက် လက်ရှိ ကျွန်တော်တို့ နိုင်ငံတွင်းမှာ အဆင်ပြေနိုင်ဖို့နဲ့ အလုပ်အကိုင် အခွင့်အလမ်းတွေ များများရမှ ပြည်သူလူထုဘဝ အဆင်ပြေနိုင်မှာ ဖြစ်ပါတယ်။ ဒါကြောင့် ကျွန်တော်တို့ ရန်ကုန်တိုင်းအတွင်းမှာဆိုရင် အထည်ချုပ် လုပ်ငန်းတွေကို ကျွန်တော်တို့ များစွာ ဆောင်ရွက်ပါတယ်။ အလုပ်သမား များများခန့်နိုင်မယ့် လုပ်ငန်းတွေကို ဦးစားပေးပြီး ပထမအဆင့် ကျွန်တော်တို့ ကြိုးစားခဲ့ပါတယ်။ ဒါကြောင့် အလုပ်အကိုင် အခွင့်အလမ်းတွေ များစွာ ရလာတယ်။ ဒီအခြေအနေကနေ ရန်ကုန်ကို ရွှေ့ပြောင်းလာတဲ့သူတွေလည်း များပြားလာတဲ့ အခြေအနေတစ်ခု ရှိပါတယ်။ ကျွန်တော်တို့ တာဝန်စယူခဲ့တဲ့ ကာလမှာ အထည်ချုပ်လုပ်ငန်းက ၂၀၀ ဝန်းကျင်လောက်ပဲ ရှိနေပြီး အခုတော့ ၆၀၀ ဝန်းကျင်လောက်ကို ရောက်လာတာ ဖြစ်ပါတယ်။
မေး။ ။အစိုးရသစ်တက်လာတယ်။ ဒါပေမဲ့လည်း နိုင်ငံခြားထွက်ပြီး အလုပ်ရှာနေသူတွေက အများကြီးပဲ။ ပတ်စပို့ လျှောက်ပြီးတော့ နိုင်ငံခြား အလုပ်ရှာနေတာက မြန်မာပြည်မှာ အလုပ်အကိုင် အခွင့်အလမ်းက နည်းသွားလို့လား။
ဖြေ။ ။ပွင့်ပွင့်လင်းလင်းပြောမယ်ဆိုရင်တော့ တချိန်တုန်းကတော့ ကိုယ့်အတွင်းလေးမှာပဲ လူတွေက နေကြတာပေါ့နော်။ အပြင်က အခြေအနေတွေကို သိပ်မသိဘူးပေါ့။ မြန်မာနိုင်ငံရဲ့ လုပ်အားခနဲ့ မြန်မာနိုင်ငံမှာ အလုပ်သမားအပေါ် ပေးနိုင်တဲ့ လုပ်အားခက နည်းပါတယ်။ နိုင်ငံတကာမှာ သွားလုပ်ရင် လုပ်အားခက ပိုရမယ်ဆိုတဲ့ အခြေအနေတစ်ခု ရှိပါတယ်။ ဒါပေမယ့် နိုင်ငံတကာမှာ သွားလုပ်တဲ့ အခြေအနေမှာ သူများမလုပ်ချင်တဲ့အလုပ်တွေကို ကျွန်တော်တို့ နိုင်ငံသားတွေ လုပ်ရတယ်ဆိုတဲ့ အခြေအနေမျိုးကတော့ စိတ်မကောင်းစရာပါပဲ။ ဒါပေမယ့် မြန်မာနိုင်ငံရဲ့ လုပ်အားခကို မြန်မြန်ဆန်ဆန် နိုင်ငံတကာနဲ့ ရင်ဘောင်တန်းဖြစ်သွားနိုင်ဖို့ဆိုတာ လတ်တလောမှာ အလွယ်ကြီး မဟုတ်သေးပါဘူး။
စက်ရုံပိတ်သိမ်းမှုနှင့် ရင်းနှီးမြှုပ်နှံမှုအခြေအနေတွေနဲ့ ပတ်သက်လို့ MCN သတင်းထောက် ကေသွယ်နဲ့ တွေ့ဆုံမေးမြန်းတာမှာ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန အမြဲတမ်းအတွင်းဝန် ဦးမျိုးအောင်က စက်ရုံအလုပ်ရုံတွေ ပိတ်သိမ်းမှုတွေရှိလာပေမယ့် တစ်ဘက်က ရင်းနှီးမြုပ်နှံမှုတွေ ၀င်ရောက်နေတာ ကြောင့် လက်ရှိ အလုပ်သမားတွေအတွက် အလုပ်အကိုင်အခွင့်အလမ်းတွေ ထိခိုက်မှု မရှိဘူးလို့ ပြောပါတယ်။
ပြီးခဲ့တဲ့ ၂၀၁၇ အတွင်းတစ်နိုင်ငံလုံးအတိုင်းအတာအရ အကြောင်းအမျိုးမျိုးနဲ့ အလုပ်ပိတ်သိမ်းခဲ့တဲ့ အထည်ချုပ် စက်ရုံ ၁၁ ခုရှိပြီး အသစ်ဖွင့်လှစ်လုပ်ကိုင်တဲ့ စက်ရုံ ၂၂ ခုရှိခဲ့တာပါ။ လက်ရှိ စက်ရုံပေါင်း ၄၄၀ကျော်ရှိပြီး၊ အလုပ်သမားပေါင်းက ၁ သန်းကျော်ရှိနေတယ်လို့ actionaid ရဲ့ စစ်တမ်းတွေက ဖော်ပြထားပါတယ်။
ကိုးကား BBC, NMC
